Daeth ei swydd i ben gyda Chwmni Pŵer Horizon ym mis Mawrth 2019, ac yn ystod ei chyfnod yn y swydd roedd wedi gweithio gyda dros 3000 o ddisgyblion, ac wedi cwrdd â llawer o athrawon. Gwelodd yn ystod y cyfnod hwn bod diffyg arbrofion Gwyddonol mewn lleoliadau ac ysgolion cynradd gyda phlant ifanc. Mae hynny’n digwydd yn bennaf oherwydd diffyg adnoddau ac arbenigedd pwnc am fod gofyn ar ddarparwyr ac athrawon i addysgu sawl pwnc a maes.

Mae’r arbrofion a’r gwaith mae Awen yn ei wneud yn dangos y cyswllt gwyddonol sydd efo popeth o’n cwmpas yn ystod ein bywydau, bob dydd. Drwy’r profiadau mae hi’n eu cynnig, gall plant weld a phrofi yn ymarferol pa mor ddiddorol a pherthnasol ydi Gwyddoniaeth. Y gobaith mwyaf sydd gan Awen yw ysbrydoli plant i ennyn diddordeb yn y maes o oed ifanc.

Teimla Awen ei bod yn hollbwysig ysbrydoli plant, ac wrth wneud y gwaith a’r arbrofion hyn, mae sgiliau eraill pwysig yn cael eu datblygu, fel datrys problemau, gweithio fel tîm, gweithio’n unigol a datblygu sgiliau motor.

Mae prinder merched yn y maes Gwyddoniaeth, ac yn hytrach na gweld hyn fel rhwystr, mae'n rhannol gyfrifol am ysbrydoli ei diddordeb yn y maes. Mae’n faes cyffrous ac mae Awen wedi cydweithio â merched gwych yn y diwydiant ac sy’n addysgu’r pwnc mewn ysgolion.

Caiff y gorau o’r ddau fyd – y diwydiant a’r dysgu - ac mae’n gweithio’n dda o gwmpas gofynion ac anghenion ei theulu prysur!